Su modellu de su cuntzertu

Poneus prus in craru, imoi, is propriedadis musicalis chi is cannas melodicas (CM), iaus a nai, mancosa e mancosedda, tenint in cumunu.

Propriedadis in comunu de is cannas melodicas (CM)

1. Donnia canna melodica portat 5 crais, is primus 4 si podint tupai cun is didus, su de cincu (arrefinu) fait su sonu prus basciu e sonat sceti candu is atrus 4 funti tupaus.
2. Sa scala musicali est diatonica magiori, ma is CM ndi sonant sceti una parti. Sceti sa nota de s’arrefinu podit essi scapiada de is atras 4.
3. Is sonus chi bessint de s’arrefinu funt sempiri aintru de sa triadi magiori chi partit de sa tonica (torrada) tenta cumenzendi de su tumbu; si podit nai 1° (8°), 3° (10°), 5° (12°) gradu de sa scala.
4. Sa torrada ddu est sempiri, e est sempiri acapiada a is atrus gradus de sa scala, mancari siat currispondenti a s’arrefinu e donnia canna melodica tenit sa torrada sua.
5. Su tretu tra sa nota de sa de 4 crais e s’arrefinu est su prus piticu tali de podi arrispetai su puntu n.3.

Su numeru de cannas melodicas chi serbint po fai is sonus de canna est 7, ma sceti 5 funt diversas a pari, duas assimbillant a is atras, sceti ca tenint diferentzia de un’otava. Po narri, mancosa de Mediana e Mancosedda de Puntu de organu funt simbilis ma diferentis de otava. Su sistema de is cannas melodicas est cumpletu, no fait a aciungi atras cannas diversas, tenendi contu de is 5 puntus inditaus innantis. Po podi agatai atras variedadis de CM tocat de brincai a su mancu unu de is 5 prinzipius, e tramudai sa scala.

Su modellu chi sighit amostat sa strutura de is CM cunsiderendi is 7 variedadis (5 + 2 de otava diversa).

Po essiri prus crarus eus aciuntu a is nominis antigus, anca su nomini de sa canna melodica est acanciada a cussu de su cuntzertu suu (po nai: mancosa de Fiorassiu, mancosedda de Puntu de Organu, e atrus) eus imperau sinnus nous (numerus romanus), chi tenint una logica insoru in sa strutura musicali de sa canna melodica etotu: difati, po chistionai in modu seguru de una precisa varieadi de CM, bastat a nai cali est de is cincu stampus cussu anca ddu est sa torrada e a su tretu chi ddu est in ottavas de sa torrada a su tumbu. Su numeru romanu postu po donnia CM narat puru in cali gradu de sa scala est sa nota de sa primu crai; po nai: in sa CM II, sa primu crai rappresentat su segundu gradu de sa scala, in sa CM III su terzu gradu, e aici a sighiri .

Si cumprendit ca sa V° portat sa propria nota de V, ma una otava prus in basciu; e su propriu balit po I e I*.

Po inditai su tretu tra sa torrada de sa CM e cussa de su tumbu eus soberau su sinnu (°) candu est de una otava e (*) candu est de tres otavas. Candu su tretu est de duas ottavas non eus postu nisciunu sinnu poita giai sempiri su tretu chi agataus est aici.

De is cannas melodicas a is Cuntzertus

Sa matrici innoi asuta amostat sa possibilidadi de cumbinatzionis de is diversas CM cun is calis fait a tenni a parti is cuntzertus giai connotus, cussus pura chi no funt mai stetius provaus a fai e chi nemus connoscit.

Sa matrici est fatta cun d’una cronissa a part’e foras e unu cuadru a parti d e aintru. In sa cronissa de foras funt inditadas is variedadis de CM, amostadas bolis cun numerus e bolis cun is nominis antigus.

Me is costaus de manca e dereta is sèti cannas funt imperadas cumenti a mancosas (o crobas); asuba e asuta is proprius cannas funt mancoseddas.

Su cuadru de aintru est formau de cuadritus; donniunu de issus currispondit a una cumbinatzioni possibili chi s’agatat anca s’atopant una riga cun d’una colonna e chi si podit iscriri asutta e forma de coordinadas, po nai: Fiorassiu (I, IV); custu bolit nai ca su Fiorassiu est formau de una CM I cumenti de mancosa e de una CM IV cumenti de mancosedda. Mediana a Pipia (V°, IV) Cun is seti variedadis de CM consideradas si podint tenni 49 possibilis cumbinatzionis, ma de custas, sceti 12 tenint unu nomini propriu, is chi abarrant non funt mai stetius portaus comenti a sonus de sa traditzioni.

De is 12 chi tenint su nomini, ndi ddu at 3 chi s’agatant, ma no tenint sonadas insoru, cumenti Su para e sa Mongia (V, V), sa Mediana Frassa (II, III) o su Moriscu (III, V) chi si podit cunsiderai sparessiu.

Tocat de tèni contu ca is 7 sinnus de numeru nomenant 7 CM chi podint essi sonadas cument’e mancosas o cumenti a mancoseddas a segunda de su cuntzertu. Po nai, sa CM V figurat una mancosedda de Puntu de organu chi podit serbiri pura cument’e mancosa po sa croba de Ispinellu. Si cunprendit insaras chi sa canna V de is mancosas est simbili a sa canna V.

In prus de fai cunprendi cumenti si formant e cantus funti is cuntzertus, custa matrici podit serbiri po amostai is simbillantzias e totu su chi tenint in comunu is cuntzertus.

Is cuntzertus chi apartenint a sa propriu cadondula tenint in comunu sa propriu mancosedda pn.:

cadondula IV: Fiorassiu, Mediana a pipia, Samponia, Ispinellu a pipia ( e totu is atras possibilis cunbinatzionis) tenint in cumunu sa sa mancosedda IV (mancosedda de Fiorassiu);

cadondula III: Ispinellu, Mediana frassa, Mediana, Tenint in comunu sa mancosedda III (mancosedda de mediana) e a sighiri aici po totu is atras cadondulas.

Is cuntzertus chi appartenint a sa riga II: Mediana frassa, Samponia, Puntu de organu e is atrus (II, V°); (II, I); (II, II); (II, I*) tenint in comunu sa propriu mancosa: II, iaus a nai mancosa de Punt’’e organu.

Riga V°: Fiuda, Mediana, Mediana a pipia e cunbinatzionis (V°, V°), (V°, II), (V°,V); (V°, I*) in comunu sa mancosa V° iaus a nai mancosa de Mediana.

Su cuadru si podit pretziri in tres tirias:

- tiria de tressu: cuadritus chi funti in sa tiria chi andat de (V°, V°) a ( I*, I*);

- tiria de iossu: cuadritus chi funt asuta de sa tiria de tressu;

- tiria de susu: cuadritus chi funt asuba de de sa tiria de tressu.

Is cunbinatzionis chi apartenint a sa tiria de tressu tenint sempiri sa mancosa gualis a sa mancosedda, po nai (I, I); (II, II) e aici a sighiri; de custas cunbinatzionis sceti sa (V, V) tenit unu nomini cosa sua: Su Para e sa Mongia.

In sa tiria de iossu sa mancosa est sempiri prus bascia de sa mancosedda cument’e Fiorassiu e Mediana; su prusu de is cuntzertus chi si sonant intrat in custa tiria.

Is cunbinatzionis de sa sa tiria de susu portant istamis sa mancosedda prus bascia de sa mancosa. Custa calidadi no est comuna meda, difati, cumenti si podit mirai in su cuadru,is unicus cuntzertus chi si podint agatai in custa tiria funt Ispinellu e Ispinellu a pipia.

A donnia cunbinatzioni chi apartenit a sa tiria de iossu ndi corrispondit un’atra in sa tiria de susu chi est posta a su travessu (mancosedda istamis de mancosa o su travessu), figuradas de dus cuadrus chi funti una a una parti e una a s’atra de sa tiria de tressu, po nai, moriscu (III, V) e Ispinellu (V, III) chi funt s’unica copia de cuntzertus chi tenit custa carateristica.

Cuncordia a Launeddas
Imedia sas